ჰაერსატარები შენობის კედლებსა და სართულშუა გადახურვებს კვეთს. ხანძრის დროს სწორედ ეს არხები შეიძლება იქცეს გზად, რომლითაც ცეცხლი და კვამლი შენობის სხვა ნაწილებში ვრცელდება. სახანძრო სარქველი ამ გზას კეტავს და ხანძარსაწინააღმდეგო ზღუდარის მთლიანობას აღადგენს.
როგორ მუშაობს
ჩვეულებრივ რეჟიმში სარქველი ღიაა და ჰაერს თავისუფლად ატარებს. ხანძრის დროს მისი ფრთა იკეტება. დახურვა ორი ძირითადი გზით ხდება:
- თერმული ელემენტით — ელემენტი განსაზღვრულ ტემპერატურაზე (ხშირად დაახლოებით 72 °C) იშლება და ზამბარა სარქველს ხურავს;
- ელექტრო ამძრავით — ამძრავი სარქველს ღიად იჭერს. სახანძრო სიგნალიზაციის სიგნალზე ან კვების გათიშვისას ზამბარა სარქველს ავტომატურად ხურავს. ბოლო ამომრთველები სარქველის მდგომარეობას სახანძრო სისტემას აცნობებს.
ელექტრო ამძრავიანი სარქველი დისტანციურად იმართება და მისი შემოწმება შენობის სისტემიდანაა შესაძლებელი, ამიტომ თანამედროვე ობიექტებზე უფრო ხშირად სწორედ მას იყენებენ.
რას ნიშნავს EI 60, EI 90, EI 120
ცეცხლმედეგობის კლასი გვიჩვენებს, რამდენ ხანს ინარჩუნებს დახურული სარქველი დამცავ თვისებებს:
- E — მთლიანობა: ცეცხლი და ცხელი აირები მეორე მხარეს არ გადადის;
- I — თბოიზოლაცია: დაუწვავი მხარის ზედაპირი დასაშვებზე მეტად არ ცხელდება;
- რიცხვი — წუთები: 60, 90 ან 120;
- S — თუ კლასს ახლავს, კვამლის გაჟონვაც შეზღუდულია.
ევროპულ პრაქტიკაში სარქველი EN 1366-2 სტანდარტით იცდება და EN 13501-3-ით კლასიფიცირდება. საჭირო კლასს სახანძრო უსაფრთხოების პროექტი განსაზღვრავს — როგორც წესი, ის იმ კედლის ან გადახურვის კლასს შეესაბამება, რომელსაც ჰაერსატარი კვეთს.
სად ყენდება
სარქველი იქ ყენდება, სადაც ჰაერსატარი ხანძარსაწინააღმდეგო ზღუდარს — კედელს ან გადახურვას — კვეთს. მნიშვნელოვანია, რომ მონტაჟი იმ წესით მოხდეს, რომლითაც სარქველი იყო გამოცდილი: სწორი ღიობი, შევსება და დამაგრება. სარქველთან წვდომაც უნდა იყოს შენარჩუნებული, რადგან ის რეგულარულად უნდა შემოწმდეს.
რა გავითვალისწინოთ შერჩევისას
- ფორმა და ზომა — ოთხკუთხა თუ მრგვალი, ჰაერსატარის კვეთის მიხედვით;
- ცეცხლმედეგობის კლასი — პროექტის მიხედვით;
- ამძრავის ტიპი — თერმული თუ ელექტრო, კვების ძაბვა;
- სახანძრო სიგნალიზაციასთან დაკავშირების საჭიროება;
- მონტაჟის ადგილი და მომსახურებისთვის წვდომა.
სარქველი და სახანძრო ჰაერსატარები
კვამლის გამწოვ სისტემებში სარქველის გარდა მნიშვნელოვანია თავად ჰაერსატარიც — იხილეთ სახანძრო ჰაერსატარები. სარქველებს ვამზადებთ ოთხკუთხა და მრგვალ ვერსიებად, ჰაერსატარის ზომით. მოითხოვეთ ფასი — მიუთითეთ ზომები და პროექტით მოთხოვნილი კლასი.